Ef setjast þarf niður til þess að spjalla eða vinna, er alltaf æskilegra að sitja í hring, í stað þess að sitja við borð eða í röðum sem vísa í átt að stjórnanda. Þannig ná allir augnsambandi, stjórnandi er á sama plani og þátttakendur, og öll samskipti verða opnari.

Þegar æfing krefst þess að skipt sé í lið, er alltaf æskilegt að það sé gert tilviljanakennt, en ekki þannig að þátttakendur velji sig saman sjálfir. Slíkt elur bara á skiptingu í hópnum og vanmáttartilfinningu þeirra sem e.t.v. eru eitthvað utanvið hópinn. Notið hugmyndaflugið og skiptið eftir lit á sokkum, gæludýraeign, háralit, stærð eða öðru sem ykkur dettur í hug.

Ef þátttakandi hefur misskilið fyrirmæli þín, er það vegna þess að þau hafa ekki verið nægilega skýr. Taktu þá ábyrgð til þín í stað þess að varpa henni á þátttakendur, það er langtum uppbyggilegra.

Ekki láta hugfallast þó hópurinn taki nýjum leik eða æfingu með semingi. Biddu hópinn um að gefa þessu tækifæri í smá stund. Ef æfingin er góð, eru allar líkur á að það dugi. Hins vegar þarf stjórnandi líka að geta hætt á réttum tímapunkti og snúið sér að öðru, ef ljóst er að æfing er ekki að ganga upp.

Hópar eru ólíkir. Þó ákveðin æfing hafi ekki gengið vel með einum hóp, er ekki þar með sagt að hún geti ekki gengið með öðrum. Prófaðu þig áfram, og reynslan mun að einhverju leyti kenna þér hvernig æfingar henta mismunandi hópum. En engar algildar reglur gilda um þetta, frekar en annað í leiklistinni.

Nýr hópur er viðkvæmur. Í upphafi er heillavænlegast að leggja áherslu á hópæfingar, og forðast það að taka út einstaklinga. Forðastu líka að nota æfingar í upphafi sem krefjast mikillar líkamlegrar snertingar. Slíkt er betra að geyma þar til hópurinn hefur byggt upp svolítið traust. Með þessum æfingum teljast hinar svokölluðu traustæfingar sem krefjast þess að þátttakendur grípi hver annan eða beri. Fyrir snertifælna og þá sem hafa áhyggjur af holdafari sínu gera slíkar æfingar ekkert nema skaða! Hér eru hugmyndir að einfaldari og árangursríkari traustæfingum.

Best er að vinna leiklistaræfingar úti á gólfi í nokkurn veginn auðu rými. Óreiða er truflandi. Forðastu að hafa stóla, nema æfingarnar krefjist þess. Snúðu stólum sem e.t.v. eru fyrir í rýminu á hvolf eða staflaðu þeim saman úti í horni, til þess að ekki verði of freistandi að tylla sér!

Tryggðu vinnufrið. Leiklistaræfingar eru þess eðlis að það getur verið mjög óþægilegt að vinna þar sem óviðkomandi ganga inn og út.

Ekki vera hrædd/ur við að endurtaka leiki/æfingar, svo lengi sem allir njóta þeirra, og eitthvað er á þeim að græða. Gerðu tilraunir með tilbrigði og stef við æfingar sem hópnum falla vel.

 Lykillinn að góðum árangri er jákvætt andrúmsloft!