Lára Sveinsdóttir útskrifaðist frá leiklistardeild Listaháskóla Íslands árið 2001.

Fyrsta hlutverk Láru hér í Þjóðleikhúsinu var Heiða í Sitji guðs englar. Hún fór með titilhlutverkið í Fíusól og hefur leikið hér í Finnska hestinum, Ballinu á Bessastöðum og Bjart með köflum.

Lára hefur leikið í fjölda sýninga sjálfstæðra leikhópa eins og Ódauðlegu verkunum með Áhugaleikhúsi Atvinnumanna, Úlfhamssögu með Öðru sviði og Hamskiptunum og Með lykil um hálsinn með Vesturporti. Hún lék Mæju Jarðaber í  Ávaxtakörfunni með Ísmedíu, Dídí mannabarn í Benedikt Búálfi með Draumasmiðjunni og Mónu Lísu í Baulaðu nú með Lab Loka.

Lára hefur starfað í Borgarleikhúsinu og leikið þar Maríu Magdalenu í Jesus Christ Superstar, Gullauga í Gretti og Lísu í Söngvaseiði.

Einnig hefur Lára leikið í sjónvarpsþáttum eins og Stelpunum og Rétti.

Lára flytur einleikinn Judy Garland ásamt Jasshljómsveit Úlfs Eldjárns í Leikhúskjallaranum í vetur, en hún er jafnframt höfundur og framleiðandi sýningarinnar.

Lára leikur í Heimsljósi og Leitinni að jólunum hér í vetur.

Nóvember 2011.