Ásdís Sif Gunnarsdóttir, Ingibjörg Magnadóttir, Ragnar Ísleifur Bragason, Ragnar Kjartansson, Snorri Ásmundsson, Saga Sigurðardóttir, Margrét Bjarnadóttir og fleiri óvæntir gestir munu setja upp nýleg verk á sviði Þjóðleikhúskjallarans í febrúar, mars og arpríl næstkomandi.

Uppsetningin verður nokkurs konar blanda af  “Soirée” eins og það var kallað í París á sínum tíma, og "Leikhúsi Listamanna". Kvöldstund þar sem listamenn deila nýlegum verkum  með sjálfum sér og áhorfendum.

“Leikhús Listamanna” var upphaflega stofnað í Klink og Bank árið 2004. Þar komu saman listamenn úr öllum áttum og sviðsettu listaverk sín. Verkin voru sjaldan æfð fyrirfram, og léku listamennirnir í verkum hver annars.

“Soirée” kvöld hafa verið haldin nokkrum sinnum í heimahúsum listamannanna síðastliðið ár í Reykjavík en þau ganga út á það að fólk hittist í húsi og stígur á stokk. Í raun og veru gildir það einu hvað fólk gerir.

Aldrei er hægt að vita við hverju er að búast á kvöldum sem þessum.