Verðlaunasýning frá LUZERNER THEATER, Sviss
Pétur Gautur
í leikstjórn Þorleifs Arnar Arnarssonar
Sýning á Listahátíð í Reykjavík
Þjóðleikhúsið, Stóra sviðið
miðvikudaginn 30. maí kl. 19.30
Verð: 3.500
Aðeins þessi eina sýning!
„Kraftmikil uppsetning sem skilur eftir sig stórar spurningar um lífið og tilveruna“ Nachkritik
Pétur Gautur er mögnuð sýning ungs íslensks leikstjóra, sem hlotið hefur mikla athygli í Evrópu. Sýningin var frumsýnd í Luzern í Sviss haustið 2010 og fékk strax frábærar viðtökur. Uppsetningin var í lok leikársins valin besta þýskumælandi sýning ársins á Nachtkritik.de af gagnrýnendum og áhorfendum. Pétur Gautur er íslenskum áhorfendum að góðu kunnur. Þetta mikla verk um leitina að sjálfum sér í barningi lífsins, um lífslygina og þrjóskuna í blekkingunni á mikið erindi við Ísland um þessar mundir.
Þorleifur Örn lauk leiklistarnámi frá LHÍ og leikstjórnarnámi frá Ernst Busch leiklistarskólanum í Berlín árið 2005 og hefur síðan þá vakið athygli sem leikstjóri í hinum þýskumælandi heimi, á Íslandi og víðar. Leikhópurinn er svissneskur en þrír íslenskir listamenn unnu að sýningunni með Þorleifi í Sviss, þau Vytautas Narbutas leikmyndahöfundur, Filippía I. Elísdóttir búningahöfundur og Símon Birgisson sem sá um vídeó og hljóð.
Sýningin er leikin á þýsku með íslenskum texta.
Gestasýningin Pétur Gautur er samstarfsverkefni Listahátíðar í Reykjavík og Þjóðleikhússins.
Meðal ummæla Nachkritik.de um sýninuna eru:
„Þorleifur Arnarsson og dramatúrginum Ulf Frötzschner hafa í áhrifamikilli leikgerð komið hinum ógnarstóra heimi Ibsens fyrir innan draumaheims Pétur Gauts sjálfs. Heimur verksins er lifandi og sterk leikmynd Vytautas Narbutas gerir það að verkum að þar geta margir heimar mæst. Kvöldið er hlaðið næmri orku, drífandi krafti og sérstöku ... andrúmslofti,"
„...þó svo að leikstjórinn setji upp sýninguna með hrun eigin lands í baksýn þá er hér á ferð miklu mun flóknari saga en það - þessi saga byrjar á endanum...“
„Ævintýri hins unga Gauts leikstýrir Þorleifur Arnarsson með samblandi af tragík og glettni, leikum með orð og sögulega nálgun. Sýningin stillir hlið við hlið öflugum og hjartnæmum senum...hún er intensív og beinskeytt ... að horfa á þessa sýningu er mikil hátíð. Leikhópurinn í heild sinni skilar af sér hágæðaleikhúsi. Þessi kraftmikla uppsetning skilur eftir sig stórar spurningar um sjálfið og tilveruna.“
„Á þessu kvöldi eru lygarnar sannar“.
Leikstjórn: Þorleifur Örn Arnarsson
Leikmynd: Vytautas Narbutas
Búningar: Filippía I. Elísdóttir
Vídeó og hljóð: Símon Birgisson
Dramatúrg: Ulf Frötzschner
Leikarar: Wiebke Kayser, Julia Reznik, Bettina
Riebesel, Jörg Dathe, Hans-Caspar Gattiker, Hajo
Tuschy, Jürg Wisbach, Samuel Zumbühl.
Um listamennina
Þorleifur Örn Arnarsson lauk leiklistarnámi frá LHÍ og leikstjórnarnámi frá Ernst Busch leiklistarskólanum í Berlín árið 2005, og hefur síðan þá vakið verðskuldaða athygli sem leikstjóri í hinum þýskumælandi heimi, á Íslandi og víðar.
Vytautas Narbutas hefur gert fjölda leikmynda og búninga í heimalandi sínu Litháen, Sviss, Finnlandi, Danmörku og hér á Íslandi í Þjóðleikhúsinu, Borgarleikhúsinu, Íslensku óperunni, Nemendaleikhúsi Listaháskóla Íslands og fyrir kvikmyndir. Vytautas starfar einnig sjálfstætt sem myndlistarmaður og hefur haldið myndlistarsýningar í Litháen, Finnlandi, Japan og á Íslandi.
Filippía I. Elísdóttir hefur á síðustu fimmtán árum komið að yfir eitt hundrað sýningum sem búninga- og sviðsmyndahönnuður, listrænn ráðgjafi og höfundur gjörninga. Sem búningahönnuður hefur hún starfað fyrir leikhús, óperur og kvikmyndir, jafnt á Íslandi sem erlendis og hlotið ýmis konar viðurkenningu og verðlaun fyrir störf sín. Hún hefur gert búninga fyrir fjölda leiksýninga hjá Þjóðleikhúsinu, LR, LA, Nemendaleikhúsinu, Íslensku óperunni og á Norðurlöndunum og í Sviss.
Tenglar
Leikhúsið í Luzern http://www.luzerner-theater.ch/
Nachtkritik.de www.nachtkritik.de/